the Ides of March III

thak gaya hoon

bohat thak gaya hoon mayn

ussi ik rah pe chaltey

girtey

sambhaltey

dhool khaatey

aur phir girtey

bohat thak gaya hoon mayn

safar zindagi ka talkh hee hai hamesha se

umeedon k saharey kat-ta bhi nahi

ma'aloom hai mujh ko

per tum aaye

aur lamhon mein

ka'ee se khwab bunn bethay

ka'ee sawalon k kitne rangeen jawab chun bethay

machal utha dil ye bhi

nakaam o nakara

barson baad mila iss ko

jeenay ka koi chara

per ye woh dil hai jo zindagi bhi

mer mer k jeeta hai

zindagi ki her ramak se

der der k jeeta hai

bolay tum meray be-chayn dil pe haath yoon rakh k

huns k, madhosh ho k, mast nazrein chaar ker k:

'sab theek hoye ga'

uth para mayn bhi phir safar ki tayari mein

dikhne laga rung, khuda, khushbu

tumhari yaari mein

ab aaye koi bhi toofan, dekha jaye ga

girey sir pe chahay aasman, dekha jaye ga

ma'aloom kya thha k tumhare saans ki mehak

tumhare honton ka ras

baney ga woh zehr e qaatil jis se

issi nadar musafir ka jigar chaak ho ga

woh khwab jo basaye tum ne meri aankhon mein

bikhar jayein ge raahon mein

raiza raiza ho k

kaanch ki kirchion ki tarah

khoon-khwar kaanton ki tarah

ab inhi raahon mein din raat kata kartey hain

tamasha dekhne waley

ji bhar k mujh pe hanstey hain

chalta hai yoonhi nok e sina be-bas saans ka raqs

khoon behta hai magar aisey k dikhta bhi nahi

dil woh hai k kisi tor bhi bikta hee nahi

bas yahee aag ka safar hai,

aur tanha mein

apni bejaan umangon k laashey gintey

dil k veeraney ko jazbat ki dafan-gah kartey

thak gaya hoon

bohat thak gaya hoon mayn.