Ghadeer

God's letter to His Friend, the Prophet Mohammad, on the 18th Day of Zil-Haj, 10 AH, to declare the vicegerency of Ali to the Muslims, in the imagination of legendary Seraiki poet, Ferdowsi e Pakistan, Saeen Irshad Jhandeer.

بعالٰی خدمت حضورِ حضرت حبیب محبوب محترم اے

جنابِ اعلٰی حضورِ والا تہاݙے توڑیں ضروری کم اے

اِتھاں وی خیر اے تے خیر منڳداں تہاݙی پل پل اتے مدامی

 تے ݙیݙھی پردہ بخیر ہوسی نہال ہوسن سڄݨ تمامی

تے پیار ٻالاں کوں میݙی طرفوں تے گھر درود و دعا سلامی 

گھدی ہے مکتوب میݙا آندا تیݙا سنہڑوُ میݙا پیامی

ݙواہے فی الفور وقت اینکوں منڳے جݙاں اذنِ ہم کلامی

تے حال سارا سڄݨ پیارا میں کیتا مکتوب وچ رقم اے

تہاݙے توڑیں ضروری کم اے

گو مُد گزر ڳئی یاد ہوسی غریب خانے تے آئے ہاوے

قدم ہا رنجہ حضور کیتا ہزاراں احسان لاۓ ہاوے

زمیں دی عظمت دی بارگاہ وچ فلک دے جھنڈے جھکاۓ ہاوے

تے دستِ پنجہ ملیندے ہوئیں زمیں دو تک مسکراۓ ہاوے

اٹھاراں سالاں دی رات تھئی ہئ جاں آئے تے ول سدھائے ہاوے

اڄݨ وی ممنون ہاں تہاݙا، وݙی نوازش وݙا کرم اے

تہاݙے توڑیں ضروری کم اے

جِتھاں اے خط خیر دا آن پہنچے، اٹھاں کوں سئیں ہُش کراوݨے چا

ول پلاݨاں دا جوڑ مِنبر اَتے خط اُتے چڑھ سݨاوݨے چا

ہے ہر کوئی رعیت، علّی ہے مولا، تے ہر کہیں توں مناوݨے چا

جیہڑا نہ منے اونہی توں پہلے بخن دا نعٰرہ مراوݨے چا

تے سارے الحاج صوفیاں کوں سݙا کے کولہوں ٻلاہوݨے چا

منیسی فرمان تیݙا میݙا مگر او جیہڑا حلالی دم اے

تہاݙے توڑیں ضروری کم اے

اے عام خط نئیں ایں خط کوں تائیں میں خاصکر سئیں ٹھہا کے لکھئم

امر دی لوح نال قلم قضا نال مَس مَوَدت دی لا کے لکھئم

ہم  آپ پڑھیا دُرود پہلے تے قدسیاں توں پڑھا کے لکھئم

تیݙے وصی دا، میݙے ولی دا، علّی دا نعٰرہ مرا کے لکھئم

سجیلا سانول سجیلے ویلے سجیلے خط کوں سجا کے لکھئم

 نہ لاڈلا سوہݨا رس پوویں توں جو خط دا لہجہ وٹا کے لکھئم

تاریخی خط ہے، تاریخی ݙینہہ ہے، تاریخی قرطاس تے قلم ہے

تہاݙے توڑیں ضروری کم اے